ئەمشەو، یەکشەممە لە چوارچێوەی ڕوبەڕوبوونەوەکانی هەفتەی 22ی خولی پلە یەکی ئیتاڵیا، یانەی ئینتەرمیلان بردنەوەیەکی گرنگی بەرانبەر لازیۆ تۆمارکرد.
ئینتەرمیلان لە جوسێپی میاتزا میوانداری یانەی لازیۆی کرد و یاری نێوانیان بە ئەنجامی سێ گۆڵ بەرانبەر گۆڵێک لە بەرژەوەندی کوڕانی کۆنتی کۆتاییهات.
گۆڵەکانی نێراتزۆری لە خولەکەکانی 22 و 45 و 64 لەلایەن ڕۆمێلو لوکاکۆ (دوو گۆڵ) و لاوتارۆ مارتینێز، گۆڵەکەی لازیۆ لە خولەکی 61 لەلایەن گۆنزالۆ ئیسکالانتییەوە تۆمارکران.
https://streamable.com/ylj61w
بەپێی ئەنجامە تۆمارکراوەکە، ئینتەر ژمارەی خاڵەکانی گەیاندە 50 و بە جیاوازی خاڵێک پێش ئەی سی میلانی ڕکابەری کەوت و لوتکەی ڕیزبەندی خولی ئیتاڵیای گرت، لە بەرامبەردا هەڵۆکانی پایتەخت بە 40 خاڵەوە لە پلەی شەشەمەوە بۆ حەوتەم دابەزین.
ڕوبەڕوبوونەوەکە بۆ ڕۆمێلو لوکاکۆی هێرشبەری بەلجیکی ئینتەرمیلان تاموچێژێکی تایبەتی هەبوو، توانی دوو گۆڵ تۆماربکات و لە ڕیزبەندی گۆڵکارانی کالچیۆ لەگەڵ کریستیانۆی پۆرتوگالی گۆڵکاری خولەکە هاوتا ببێتەوە.
