ئەگەرچی مێژووی هونەر و مۆسیقا لە شاری سنە مێژوویەکی کۆنە و دەیان هونەرمەند و گۆرانیبێژ و فەرهەنگ دۆست لە شارەکەدا نەماون یان کۆچی دواییان کردووە، بەڵام ئێستاش سنە ڕۆحێکی نوێی مۆسیقا و هونەرە لە ڕۆژهەڵاتی کوردستان.
بە بۆنەی ناساندنی شاری سنە بە شاری داهێنەری مۆسیقا دوێنێ 3ی شوبات بە ئامادەبوونی جێگری سەرۆککۆماری ئێران و بەرپرسانی شارەکە ڕێوڕەسمی دەستبەکاربوونی لیژنەکانی پەیوەست بەو ناسناوە بەڕێوەچوو.
لە هەموو جیهان 30 شار وەکوو شاری داهێنەری مۆسیقا ناسراون کە سنەش یەکێک لەوانەیە کە لە لایەن یونێسکۆوە ئەم ناسناوەی پێ بەخشراوە.
لە هەموو جیهان 246 شار ناوی داهێنەرییان پێ بەخشراوە کە لە ئێران شارەکانی ئەسفەهان، ڕەشت، بەندەرعەباس و سنە لە ڕیزی ئەو شارانە دان و سنە وەکوو شاری داهێنەری مۆسیقا ناسراوە.
