دوای کۆبوونەوەی ئەمڕۆی شاندی وەزارەتی پیشەسازیی عێراق و وەزارەتی بازرگانیی هەرێم، ڕایانگەیاند کە بڕیاری هەماهەنگی تەواوی نێوان هەردوولا درا لە پەرەپێدانی کەرتی پیشەسازی و جێبەجێکردنی بڕیارەکان لە هەرێمی کوردستان و سەرتاسەری عێراق.
لە کۆنگرەیەکی ڕۆژنامەوانیی هاوبەشدا کەمال موسلیم و مونهەل عەزیز ڕایانگەیاند، لە کۆبوونەوەی ئەمڕۆدا سەرجەم پرسەکانی نێوان هەردوولا تاوتوێکران، لەوانە شارە پیشەسازییەکان و ئەو گەشەپێدانی پیشەسازیی لە هەرێمی کوردستان و عێراق و ئاگاداربوون لە بڕیارەکان لە هەرلایەکەوە بێت.
کەمال موسلیم وتیشی، “سەرجەم کێشە و گرفتەکانی کەرتی پیشەسازی و داواکارییەکانی پیشەسازیی هەرێممان خستووەتە بەردەم وەزارەتی پیشەسازیی عێراق”.
ئاماژەی بەوەشکرد، کە ئەمڕۆ بڕیاری پێکهێنانی لیژنەیەکی هاوبەشمان لە وەزارەتی پیشەسازیی عێراق و وەزارەتی پیشەسازیی هەرێمدا تاوەکو چاودێری کارەکانی هەردوولا بکات و دواتر ڕاپۆرتی خۆیان ڕادەستیی وەزارەتی پیشەسازیی دەکەن.
وەزیری پیشەسازیی هەرێم ڕاشیگەیاند کە لە ماوەیەکی نزیکدا لیژنەیەکی وەزارەتمان سەردانی بەغداد دەکات بۆ جێبەجێکردنی ئەو بڕیارانەی کە ئەمڕۆ لە کۆبوونەوەکەدا دراون.
