بەهۆی ئامادەنەبوونی ژمارەی پێویستی پەرلەمانتاران کۆبوونەوەی ئەنجومەنی نوێنەران بۆ کاتژمێر 4:00 ی پاشنیوەڕۆ دواخرا.
غەریب ئەحمەد ئەندامی ئەنجومەنی نوێنەرانی عێراق بە تۆڕی میدیایی ئێستای راگەیاند، “بەهۆی ئامادەنەبوونی ژمارەی پێویستی ئەندامانی ئەنجومەنی نوێنەران کۆبوونەوەی ئەنجومەنەکە بۆ کاتژمێر 4:00 ی پاشنیوەڕۆ دواخرا، بەڵام بەهۆی ئەوەی بەشێک لە پەرلەمانتاران لە گەشتن و نەگەڕاونەتەوە پێناچێت ئەوکاتیش رێژەی یاسایی پەرلەمانتاران ئامادەبن و کۆبوونەوەکە بکرێت.
ئاشکراشیکرد، بەپێی یاسا رۆژی 7 ی مانگ وادەی کارکردنی کۆمسیۆنی هەڵبژاردنەکان لە عێراق کۆتاییدێت، ئەگەر تا ئەو کاتە ئەنجومەنی نوێنەران نەتوانێت کۆببێتەوە و وادەکەی درێژبکاتەوە، عێراق دەکەوێتە قەیرانێکی گەورەی یاساییەوە، دەبێت دواتر بەدوای دەرچەیەکدا بگەڕێن بۆ چارەسەرکردنی.
باسیلەوەشکرد، تا ئێستا دوو بۆچوون هەیە بۆ درێژکردنەوەی تەمەنی کۆمسیۆن، یەکێکیان ساڵێک و ئەوی دیکەش چوار ساڵە بۆ کۆمسیۆنەکە درێژبکرێتەوە، بەڵام تا کۆبوونەوەی ئەنجومەنی نوێنەران نەکرێت ناتوانرێت یەکلاییبکرێتەوە.
