ئەستێرەی بەرازیلی یانەی یوڤانتۆس، ئارسەر مێلۆ لە چاوپێکەوتنێکدا باسی ئەزموونی خۆی لەگەڵ لیۆ مێسی و کریستیانۆ ڕۆناڵدۆ دەکات و باشترینیان دیاریدەکات.
ئەستێرەکەی سیلیساو چاوپێکەوتنێک لەگەڵ کەناڵی دیسیمپیدیدۆس لە پلاتفۆرمی “یو تیوب” ئەنجامدەدات، لە بارەی کریستیانۆ و مێسی کە لەگەڵ هەردووکیاندا یاریکردووە چەندین زانیاری ئاشکرادەکات.
ئارسەر دەڵێت، ” کریستیانۆ لە ژووری جلگۆڕینەکان زیاتر گوزارشت لەخۆی دەکات و لەگەڵ یاریزانان پەیوەندی دەبەستێت، لەگەڵ هەمووان قسە دەکات و پەیوەندی باشی لەگەڵ هەموواندا هەیە، ڕەنگە بەهێزی پەیوەندی لەگەڵ من بۆ ئەوە بگەڕێتەوە کە هەردووکمان بە یەک زوبان قسەدەکەین”.
هەروەها دەڵێت، ” هەریەکەیان بە شێوازی خۆی ڕابەری پێکهاتەکانیان دەکەن، مێسی بە کردار ئەوەی سەلماندووە، بەڵام بە ئاشکرا وا دەرناکەوێت، کاتێک تۆپ دەکەوێتە پێیەکانەوە هەنگاو بۆ سەرکەوتن دەنێت و هەموو هاوڕێکانی لەو ڕاستییە تێدەگەن”.
لە وەڵامی پرسیارێکدا دەربارەی باشترینی نێوان دوو ئەفسانە زیندووەکە، یاریزانەکەی یوڤی ڕایدەگەیەنێت، ” کریستیانۆ هەڵدەبژێرم، ئێمە بەیەکەوە یاریدەکەین”.
لە وەڵامی پرسیارێکی دیکەدا سەبارەت بە پەیوەندی لەگەڵ کریستیانۆ ئارسەر دەڵێت، ” ئەوەندە لە کریسیانۆوە نزیکنیم بچمە ماڵەکەی قاوە بخۆمەوە، بەڵام پەیوەندیمان زۆر باشە، کریستیانۆ هەرگیز پشت لە هاورێکانی ناکات و هەر یاریزانێک پێویستی پێی بێت بەوپەڕی تواناوە یاریدەی دەدات، وەک ئاژەڵ ڕاهێنان دەکات. ناحەوێتەوە و هانماندەدات زیاتر خۆمان ماندووبکەین، بەردەوام ئامۆژگاریم دەکات و پێمدەڵێت چ جۆرە خواردنێک بخۆم، ڕێگە بە ڕێکەوت نادات، بۆ هەموو شتێک ئامادەیە”.
