وەزیری بەرگریی کۆریای باشوور نامەی دەستلەکارکێشانەوەی خۆی پێشکەشی دەسەڵاتدارانی وڵاتەکە کرد.
بی بی سیی بەریتانی بڵاویکردەوە، کیم یۆنگ هیون، وەزیری بەرگریی کۆریای باشوور دەستلەکارکێشانەوەی خۆی پێشکەشی بەرپرسانی باڵای سەرۆکایەتیی وڵاتەکەی کردووە.
باس لەوەش دەکات، یوان سوک یۆل، سەرۆکی کۆریای باشوور، دەبێت ئەو دەستلەکارکێشانەوەیە قبوڵبکات بۆ ئەوەی بچێتە بواری جێبەجێکردنەوە.
پێشتر یاسادانەرانی وڵاتەکە پێشنیارێکیان خستووەتەڕوو بۆ دوورخستنەوەی کیم یۆنگ هیون، وەزیری بەرگریی کۆریای باشوور، ئەمە جگە لەوەی هەوڵی دوورخستنەوەی سەرۆکی وڵاتەکەش دەدرێت.
گرژییەکانی کۆریای باشوور پەرەیان سەندووە و رۆژی رابردوو سەرۆکی وڵاتەکە باری نائاسایی راگەیاند.
سەرۆکی کۆریای باشوور، پارتی دیموکراتی ئۆپۆزسیۆنی بە هاوکاریکردنی کۆریای باکوور تۆمەتبار کرد کە ئەو پارتە زۆرینەی پەرلەمانیی وڵاتەکەی هەیە.
یوان سوک یۆل لە وتارەکەیدا وتی، بۆ پاراستنی کۆریای باشووری لیبڕاڵ لە هەڕەشەکانی هێزە کۆمۆنیستەکان لە کۆریای باکوور، باری نائاسایی رادەگەیەنم.
