بەڕێوەبەرایەتیی هاتوچۆی گەرمیان رایدەگەیەنێت، لە رووداوێكی هاتوچۆدا لەسەر رێگای كەلار – خانەقین كەسێك گیانیلەدەستدا و سێ كەسی دیكە برینداربوون.
بەپێی راگەیەندراوێكی بەڕێوەبەرایەتیی هاتوچۆی گەرمیان كە وێنەیەكی دەست تۆڕی میدیایی ئێستا كەوتووە و تێیدا هاتووە، بەهۆی پێكدادانی دوو ئۆتۆمبێلی جۆری نیسان سێنترا و شۆفرلێت ئۆپترا كەسێك گیانیلەدەستدا و سێ كەسی دیكە برینداربوون.
ئاماژە بۆ ئەوە كراوە، رووداوەكە لەسەر رێگای كەلار – خانەقین لە نێوان هەردوو گوندی شێرەوەن و تۆپ عەسكەربووە كە بەهۆی پێكدادانی دوو ئۆتۆمبێلی جۆری نیسان سێنترا و شۆفرلێت ئۆپترا بووە و چوار كەس برینداربوون سێ كەسیان لە ئۆتۆمبێلی سێنتراكەدا بوون كە بە ئاراستەی كەلار هاتوون و بەهۆی سەختی برینەكەیەوە یەكێك لەسەرنشینەكان گیانیلەدەستدا.
هەر لە راگەیەندراوەكەدا هاتووە، بریندارەكان گەیەندراونەتە نەخۆشخانەی فریاكەوتنی شەهید هەژار لە كەلار و لێكۆڵینەوە لە رووداوەكە لەلایەن تیمەكانی هاتوچۆوە دەستیپێكردووەتەوە.
