بەڕێوەبەرایەتیی نەهێشتنی ماددە هۆشبەرەكان رایدەگەیەنێت، چوار بازرگانی دەستگیركران و بڕی 14 كیلۆگرام ماددەی هۆشبەریش لە جۆری كریستاڵ دەستی بەسەرداگیرا.
بەڕێوەبەرایەتیی نەهێشتنی ماددە هۆشبەرەكان لە راگەیەندراوێكدا باسی لەوەكردووە، “لە بەردەوامی هەوڵەكانمان لە رووبەڕووبوونەوە و نەهێشتنی ماددە هۆشبەرەكان لە پڕۆسەیەكی بەدواداچوون و كۆكردنەوەی زانیاریی ورد كە چەند رۆژێكی خایاند توانرا ئەندامانی باندێكی مەترسیداری بازرگانیكردن بە ماددەی هۆشبەر دەستگیربكرێن”.
ئاماژە بۆ ئەوەش كراوە، ئەندامانی باندەكە پێكهاتبوون لە چوار تۆمەتباری بیانی، بەنیازبوون بڕی 14 كیلۆگرام ماددەی هۆشبەر لە جۆری كریستاڵ بهێننە ناو هەرێم و لەنێو تایەی بارهەڵگر بە شێوازێكی زۆر ورد حەشاریان دابوو.
هەر لە راگەیەندراوەكەدا هاتووە، تۆمەتبارەكان رادەستی یاساكراون و بەپێی یاسای بەرەنگاربوونەوەی ماددەهۆشبەرەكان و كارتێكەرە عەقڵییەكان پەڕاوی لێكۆڵینەوەیان بۆ كراوەتەوە مامەڵەیان لەگەڵ دەكرێت.
