باڵیۆزخانەی سویسرا جارێکی دیکە لە عێراق دەکرێتەوە، ئەوەش دوای 33 ساڵ بەسەر داخستنیدا.
ئەم هەنگاوە لە چوارچێوەی ستراتیژی ئەنجوومەنی فیدراڵی سویسرایە بۆ ناوچەی رۆژهەڵاتی ناوەڕاست و باکووری ئەفریقا بۆ ساڵی 2021-2024 دێت، ئامانجی پتەوکردنی پەیوەندییە دووقۆڵییەکانە لەگەڵ عێراق و قووڵکردنەوەی هاوکارییەکان لە بوارەکانی ئابووری و ئاسایش و کۆچبەریدا.
ئەنجوومەنی فیدراڵی سویسرا لە بەیاننامەیەکدا ئاماژەی بەوەکردووە، “دۆخی ئەمنی عێراق لەم ساڵانەی دواییدا باشتربوونی بەرچاوی بەخۆیەوە بینیوە، چووەتە قۆناغێکی نوێی گەشەسەندنی ئابووری و خەریکە رۆڵی خۆی وەک ناوبژیوانێکی هەرێمی بەهێزتر دەکات”.
باس لەوەشکراوە، عێراق هەوڵی بەردەوام دەدات بۆ بەرزکردنەوەی ئاشتی و ئاسایش لە ناوچەکەدا، ئەمڕۆش زیاتر لە 50 باڵیۆزخانەی وڵاتانی جیاواز لە بەغدا لەخۆدەگرێت، لەوانە نەمسا، فەرەنسا، ئیتاڵیا و ئەڵمانیا.
