لە ئەنجامی بارینی بارانی بە خوڕ و دروستبوونی لافاو لە ناوەڕاستی تورکیا کەسێک گیانیلەدەستدا و ژمارەیەکی دیکەش بێسەروشوێن بوون.
میدیاکانی تورکیا بڵاویانکردەوە، لە شەوی رابردووەوە بارانێکی بە خوڕ ناوەڕاستی تورکیای گرتووەتەوە و بەهۆیەوە لە ناوچەی گۆلۆسی سەر بە شاری قەیسەری پیاوێکی تەمەن 52 ساڵان کە پیشەی شوان بووە لافاو بردوویەتی و دوای چەند کاتژمێرێک و لە دووری پێنج کیلۆمەتر تەرمەکەی دۆزراوەتەوە.
ئاشکراشیانکرد، لەلایەن تیمە فریاگوزارییەکانەوە ژمارەیەک هاوڵاتیی رزگارکراون و هێشتا ژمارەیەکی دیکەش بێسەروشوێنن.
جگە لە زیانە گیانییەکان لافاو زیانێکی زۆری ماددی بەر ئەو ناوچانە گەیاندووە بە تایبەت لە پارێزگای سیواس.
لە مانگی ئەیلولی ساڵی رابردوو شەپۆلێکی هاوشێوە باکووری رۆژئاوای تورکیای گرتەوە و بەهۆیەوە لایەنی کەم پێنج کەس گیانیان لەدەستدا، کە دووانیان لە ئیستانبوڵ بوون.
