لەگەڵ ویستی زیاتری مرۆڤ لەسەر تەندروستیی جەستە و لەش رێكی، هەریەك لە تۆوی چیا و تۆوی كەتان خواستی زۆریان چووەتە سەر بەهۆی بەها بەرزە خۆراكییەكەیان و تایبەتمەندییە سوودبەخشە تەندروستییەكانیانەوە.
دەتوانرێت ئەم تۆوانە بخرێنە ناو ئاو، ئاوی میوە، خواردنەوە، ژەمی شۆفان و زەڵاتەوە، بەتەنها زیادكردنیان بەسە بۆ گۆڕینی ژەمەكە بۆ ژەمێكی سوودبەخش و تەندروست، وەك ئەوەی لە رۆژنامەی (Times of India) بڵاوكراوەتەوە.
هەردوو جۆرە تۆوەكە دەوڵەمەندن بە سەرچاوە خۆراكییە سەرەكییەكان، ریشاڵ و چەوریی تەندروست، كە وایان لێدەكات بەهایەكی خۆراكی باش و هاوسەنگیان هەبێت، بەڵام جیاوازی هەیە لەوەی كامیان باشترە بۆ جەستە.
تۆوی چیا
تۆوی چیا سەرچاوەی خۆراكیی وەك ریشاڵ، پرۆتین، ترشی چەوریی ئۆمیگا-3، دژە ئۆكسان، ڤیتامینات و كانزا جیاوازەكانی وەك كالسیۆم، فسفۆر و مەگنسیۆمی تیایە.
سوودە تەندروستییەكان
تۆوی چیا بەناوبانگە بە ناوەرۆكە بەرزەكەی لە ریشاڵ، كە پاڵپشتیی تەندروستیی كۆئەندامی هەرس دەكات و هاریكار دەبێت لە رێكخستنی ئاستی شەكر لە خوێندا. هەروەها سەرچاوەیەكی باشی پرۆتینی رووەكی و ترشی چەوریی ئۆمیگا-3یە، كە پاڵپشتیی تەندروستیی دڵ دەكات و هەوكردن كەمدەكاتەوە.
تۆوی كەتان
تۆوی كەتان پڕە لە ریشاڵ، پرۆتین، ترشی چەوریی ئۆمیگا-3، لیگنان (ئاوێتە رووەکییەکان کە تایبەتمەندیی دژە ئۆکسێنەریان هەیە)، ڤیتامینەكان و كانزاكانی وەك مەنگەنیز و ڤیتامین B1 كە بە سیامین ناسراوە.
سوودە تەندروستییەكان
تۆوی كەتان هاوشێوەیە لەگەڵ چیا لە سوودە باشەكانی بۆ تەندروستیی دڵ بەهۆی بوونی ترشی چەوریی ئۆمیگا-3، هەروەها سەرچاوەیەكی گرنگی لیگنان-ە، كە تاوتوێی كاریگەرییەكانی لەسەر خۆپاراستن لە شێرپەنجە كراوە.
هەروەك ریشاڵەكانی ناوی سوودبەخشە بۆ هەرس و زیادكردنی هەستی تێربوون، ئەمەش وایلێدەكات باش بێت بۆ كۆنتڕۆڵكردنی كێشی جەستە. هەروەها هاوسەنگ كردنی ئاستی شەكر لە خوێندا لەڕێی حاوكردنەوەی پرۆسەی هەرس و مژینی كاربۆهیدرات.
