زۆر هەن دەناڵێنن بەدەست نەخۆشییەكانی ناوەڕاستی تەمەن وەك سستی مێشك، کەمخەوی، کەمی میزاج و هتد، بەڵام بەشێكی زۆریان نازانن كە كۆی ئەم نیشانانە پەیوەندیدارە بە كەمی تاكە سەرچاوەیەك كە ئەویش مەگنسیۆم-ە.
رۆژنامەی تایمزی بەریتانی لە زاری ریان ستیڤنسۆن، پسپۆڕی خۆراك و دامەزرێنەری كۆمپانیای پیشەسازیی تەواوكارە خۆراكییەكان رایگەیاند، كەمی كالسیۆم یەكێكە لە زۆرترین حاڵەتە بڵاوەكانی بەدخۆراكی لە سیستمی خۆراكیی رۆژانەدا.
لینیا باتیل، پسپۆری خۆراك ئاشكرایكرد، مەگنسیۆم بەشداردەبێت لە زیاتر لە 600 كارلێكی بایۆكیمیایی لە جەستەدا.
وتیشی، “كانزایەكی خۆراكیی سەرەكییە، بەشداردەبێت لە بەرهەمهێنانی وزە و ئەركی كۆئەندامی دەمار و رێكخستنی فشاری خوێن و رێكخستنی رێژەی گلۆكۆز لە خوێندا، هەروەك رۆڵێكی گرنگی هەیە لە رێكخستنی سترێس و خەوتندا”.
نیشانەكانی كەمبوونیشی (گۆڕانی میزاج، شەقیقە، تێكچوونی خەو و هەستكردن بە نائارامی گشتیی) لەخۆدەگرێت، وەك ئەوەی ئەو پسپۆڕە ئاماژەی پێدا.
توێژینەوەیەك كە لە گۆڤاری پزیشكیی بەریتانی بڵاوكراوەتەوە لای خۆیەوە ئاشكرایكرد كە پەیوەندی هەیە لەنێوان ئاستی مەگنسیۆم و دابەزینی مەترسیی تووشبوون بە لاوازی ژیری، هەروەك توێژینەوەیەكی نوێ كە لە گۆڤاری ئەگینگ نیورۆساینس بڵاوكراوەتەوە دەڵێت، مەگنسیۆم كاری ژیری باشدەكات. هەروەك بەپێی بەدواداچوونێك كە ساڵی 2017 لەسەر 18 توێژینەوە لەلایەن توێژەرانی دەروونناسی ئەنجامدراوە دەریدەخات كە مەگنسیۆم دەبێتە هۆی كەمبوونەوەی دوودڵی.
تەندروستیی دڵ-یش پێویستی بە بڕێكی زۆر لە خواردنی مەگنسیۆم هەیە، دوای چاودێریی نزیكەی 90 هەزار كەس بە درێژایی 28 ساڵ، توێژینەوەیەك لە گۆڤاری كۆمەڵەی دڵی ئەمریكی دەڵێت، ئەو كەسانەی بڕێكی زۆر مەگنسیۆم وەردەگرن (تا 349 میلیگرامی رۆژانە) بەڕێژەی 39% كەمتر تووشی جەڵتە و نەخۆشییەكانی دڵ دەبنەوە، بەراورد بەوانەی كەمتر دەخۆن (كەمتر لە 246 میلیگرامی رۆژانە).
پیاو رۆژانە پێویستی بە 300 میلیگرام مەگنسیۆم هەیە، لەكاتێكدا ژنان پێویستیان بە 270 میلیگرامە. كانزاكە لە تۆو و چەرەسەكاندا هەیە بەتایبەت لە بادەم و كاجۆ و گوێزدا.
