ماوەی 20 رۆژە هەناردەی نەوتی عێراق بۆ ئوردن وەستاوە و تا ئێستا هیچ لایەنێک روونکردنەوەی لەبارەی هۆکارەکەی نەداوە.
میدیا عێراقییەکان بڵاویانکردەوە، لە 22 ی نیسانی ئەمساڵەوە تا ئەمڕۆ هەناردەی نەوتی عێراق بۆ ئوردن وەستاوە و بێ ئەوەی لایەنی عێراقی و ئوردنی هیچ لێدوانێک لەبارەیەوە بدەن.
ئاماژەیان بەوەشکرد، وەستانی هەناردەی نەوتی عێراق بۆ ئوردن زیان بە هەردوو وڵات دەگەیەنێت بە تایبەت عێراق چونکە پێویستی بە بەندەرێکی دیکە دەبێت بەهۆی وەستاندنی هەناردە لە بەندەری جەیهانەوە، جگە لەمەش 500 تانکەری گواستنەوەی نەوت بێکارماونەتەوە.
بەپێی رێکەوتنێکی هەردوو حکومەتی ئوردن و عێراق کە ساڵی رابردوو نوێ کرایەوە، رۆژانە عێراق بڕی 10 هەزار بەرمیل نەوت هەناردەی ئوردن دەکات، بەڵام لە سەرەتای ئەمساڵەوە بڕەکەی بۆ 15 هەزار بەرمیل بەرزکراوەتەوە، بەڵام رێکەوتنەکە لە مانگی ئایاری ئەمساڵ کۆتایی دێت.
