قائیمقامیەتی سلێمانی داوا لە مارکێت و خاوەن کۆگاکان دەکات شوێنێک تەرخانبکەن بە هەڵگرتنی خواردن و پێداویستییە ماوە بەسەرچووەکان.
قائیمقامیەتی سلێمانی بڵاویکردەوە، لەپێناو جیاکردنەوەی ئەو خۆراک و شەمەکە خراپ و بەسەرچووانەی لە مارکێت و کۆگاکاندا هەن، لیژنە هاوبەشەکان داوا دەکات شوێنی تایبەتیان بۆ دروستبکرێت و لێی بنوسرێت بۆ فرۆشتن نییە.
لای خۆیەوە جەمال محەمەد سەرۆکی لیژنەی کۆگاکان لە قائیمقامیەتی سلێمانی رایگەیاند، لە هەموو سەردان و بەدواداچونەکاندا ئاگاداریمان داوە بە کۆگاو فرۆشگاکان، بەشی زۆریان پابەند بوون.
ئاشکراشیکرد، لەهەر شوێنێک خواردن و شمەکی خراپ و بەسەرچوو لەلایەن لیژنەکانەوە ببینرێت ئەگەر جیانەکرابێتەوە بە سەرپێچی هەژماردەکرێت.
جەختیشیکردەوە، هەر مارکێت یان کۆگاو کارگەیەک ئەگەر شمەک و خواردنی ماوەبەسەرچووی هەبێت دەتوانێت لیژنە هاوبەشەکانی لێئاگاداربکاتەوە و تەواوی شمەک و خۆراکەکەی بۆ لەناودەبەن.
