هەر کەسێکی پێگەیشتووی ئاسایی پێویستە حەوت کاتژمێر یان زیاتر لە شەودا بخەوێت، مەرجە خەوەکەی پچڕپچڕ نەبێت کەشی شوێنەکەی بۆی گونجاوبێت تا بتوانێت لە کاتەکانی رۆژدا کارەکانی خۆی بە باشی ئەنجامبدات و پێویست بە سەرخەو شکاندن نەکات.
هەندێک کەس لە زۆرینەی کاتەکانی رۆژدا ئارەزووی خەوتن دەکەن و خەواڵووییان پێوەدیارە ئەمەش پەیوەندی بە چەندین هۆکارەوە هەیە لەوانەش:
-نەخەوتن بەگوێرەی پێویست.
-هۆکاری دەوروبەر، وەک پرخەی ئەو کەسەی لە ژوورەکەتدا دەخەوێت یان هەستانی منداڵە ساواکەت، یان دەنگە دەنگی ماڵە دراوسێکانت وا دەکات خەوەکەت پچڕپچڕ بێت و بە ئاسودەیی کاتی خەوەکەت بەسەرنەبەیت.
-کارکردن لە چەند شەفتێکی جیاوازدا وا دەکات بە پێی پێویست نەخەویت بە تایبەت گەر کارەکانت لە شەودا بن.
-دۆخی دەروونی، وەک سترێس و خەمۆکی وا دەکەن زۆرینەی کاتی شەو بەخەبەر بیت و لە رۆژدا خەواڵوو بیت.
-بەکارهێنانی دەرمان، بە تایبەت هێورکەرەوەکان و ئەو دەرمانانەی بۆ هەستیاری بەکاردێن.
-گەشتکردن بە فڕۆکە بۆ ماوەیەکی درێژ کاریگەریی لەسەر کاتژمـێری بایلۆجی دەبێت و خەو تێکدەدات.
-نەخۆشییەکانی کاتی خەوتن، وەک وەستانی هەناسە لەکاتی خەودا، کۆنتڕۆڵنەکردنی جوڵەی قاچ لەکاتی خەودا، رۆیشتن بەدەم خەوەوە.
