قوباد تاڵەبانی، رایدەگەیەنێت، “دەبێت ئاسانکاریی تەواو بۆ وەبەرهێنەرانی گەرمیان بکرێت و رۆتین کەمبکرێتەوە”.
ئەمڕۆ دووشەمە، قوباد تاڵەبانی، جێگری سەرۆکوەزیرانی هەرێم لە کەلار کۆبوونەوەیەکی لەگەڵ بەرپرسانی ئیدارەی گەرمیان ئەنجامدا و رایگەیاند، لەپێناو باشتر خزمەتکردنی هاوڵاتییاندا لە هەر کاتێکدا بە پێویستی بزانن گۆڕانکاری لە پۆستە ئیدارییەکانی سنوورەکەدا دەکەن.
قوباد تاڵەبانی ئاماژەی بەوەدا، لەپێناو بەهێزکردنی کەرتی تایبەت و هاندانی زیاتری وەبەرهێنەران، دەبێت لە بەڕێوەبەرایەتییەکانی گەرمیان ئاسانکاری تەواو بۆ وەبەرهێنەران بکرێت و رۆتین کەمبکرێتەوە.
لە کۆبوونەوەکەدا قوباد تاڵەبانی رایگەیاند، نەک هەر دەبێت ئاسانکاریی تەواو بۆ وەبەرهێنەرانی سنوورەکە بکرێت، بەڵکو پێویستە کاربکرێت هانی وەبەرهێنەران بدرێت لە ناوچەکانی دیکەشەوە رووبکەنە ئیدارەی گەرمیان و بەشداربن لە بووژانەوەی ئابوری لە سنوورەکەدا.
جێگری سەرۆک وەزیرانی هەرێم بە بەرپرسانی ئیدارەی گەرمیانی راگەیاند، پلانێکی گونجاو بۆ پەرەپێدانی کەرتەکانی کشتوکاڵ و گەشتیاری ئامادەبکەن کە لەگەڵ ژینگە و تواناکانی سنوورەکەدا بگونجێت.
لە کۆبوونەوەکەدا، قوباد تاڵەبانی، بڕیاریدا لەسەر چارەسەرکردنی بەشێک لە داواکارییەکانی بەڕێوەبەرایەتییەکانی ئیدارەی گەرمیان.
