وتەبێژی تەندروستیی سلێمانی رایدەگەیەنێت لە سبەینێوە هەڵمەتی کوتان دژی نەخۆشی سورێژە لە منداڵاندا دەستپێدەکات و ماوەی 10 رۆژ بەردەوام دەبێت.
سامان لەتیف وتەبێژی تەندروستیی سلێمانی بە تۆڕی میدیایی ئێستای راگەیاند، لە سبەینێ سێشەممەوە بەبەشداریی 440 تیم هەڵمەتی کوتان دژی نەخۆشی سورێژە لە باخچەی ساوایان و خوێندنگە بنەڕەتییەکانی سنووری سلێمانی دەستپێدەکات.
ئاماژەی بەوەشکرد، ڤاکسینەکە لە رێگەی دەرزییەوە بە منداڵان دەدرێت، هەر منداڵێک بە هەر هۆکارێک لە باخچەکەی یان لە خوێندنگەکەی نەتوانرا ڤاکسینی پێبدرێت دەتوانێت سەردانی بنکە تەندروستییەکان بکات و لەو بنکانەش بەردەست دەبێت.
ئاشکراشیکرد، هەڵمەتەکە لەلایەن وەزارەتی تەندروستیی عێراقەوە راگەیەندراوە، هەمیشە هەڵمەتی کوتانیش کاتێک دەستپێدەکات کە تووشبوون نەخۆشییەک روو لە زیادبوون بێت.
