محەمەد شیاع سودانی سەبارەت بە دەستپێکردنەوەی گەشتەکانی فڕۆکەخانەی نێودەڵەتیی سلێمانی و تورکیا رایگەیاند، گفتوگۆ لەگەڵ تورکیا دەکەن و هەوڵی چارەسەرکردنی کێشەکە دەدەن.
لە کۆبوونەوەی لەگەڵ فراکسیۆنی یەکێتیی لە ئەنجومەنی نوێنەرانی عێراق محەمەد شیاع سودانی رایگەیاند، ، حکومەتەکەی ئەرکی لە دابینکردنی بودجەی هەڵبژاردن و هاندان و هاوکاری کۆمیسیۆنی سەربەخۆی هەڵبژاردنەکانی جێبەجێکردووە و گرنگە هەڵبژاردن ئەنجامبدرێت.
لە بەشێکی دیکەی کۆبوونەوەکەدا فراکسیۆنی یەکێتی چەند داواکارییەکیان خستە بەردەمی سودانی لەوانەش، قەرەبووکردنەوەی زیانلێکەوتوانی لافاوەکەی دهۆک و ناوچەکانی دیکەی کوردستان و دوکاندار و کاسبکارانی بازاڕی لەنگەی هەولێر و گواستنەوەی مووچەی مامۆستایانی خوێندنی کوردی لەکەرکوک بۆ سەر وەزارەتی پەروەردەی فیدڕاڵێ و داننان بە زانکۆی گەرمیان و چەرمۆ و راپەرین لەلایەن وەزارەتی خوێندنی باڵای فیدڕاڵەوە و ژمارەیەک پرۆژەی خزمەتگوزاری بۆ خانەقین و خورماتوو، هەروەها پرۆژەی ئاوی خواردنەوەی چەمچەماڵ و دامەزراندنی سندوقی ئاوەدانکردنەوەی هەڵەبجە و گرنگیدان بە هەڵدانەوەی گۆڕە بەکۆمەڵەکانی تاوانی ئەنفال، ناوبراویش بڕیاریدا لیژنەیەکی هاوبەش لەنێوان فراکسیۆنی یەکێتی و نووسینگەی سەرۆک وەزیران بەپەلە پێکبهێنرێت بۆ جیاکردنەوە و جێبەجێکردنی داواکارییەکان، کە بەشێوەی نوسراوی رەسمی ئاڕاستەکراون.
