سەرۆکی ئەرکانی سوپای عێراق: هیچ هێزێکی سەربازیی هاوپەیمانان لە عێراق بوونی نییە

عەبدولئەمیر رەشید یارەڵا سەرۆک ئەرکانی سوپای عێراق رایگەیاند، هیچ هێزێکی سەربازیی هاوپەیمانان لەسەر زەوی عێراقدا نییە و ئەرکی هاوپەیمانییەکە تەنها لە “پشتیوانی ئاسمانی”دا سنووردارە.

سەرۆک ئەرکانی سوپای عێراق ئاماژەی بەوەشکردووە، عێراق دەیەوێت سنوورێکی کاتی دیاریکراو دابنێت بۆ تەواوکردنی ئەرکی هاوپەیمانی بەتەواوی و گواستنەوەی پەیوەندییەکان بۆ قۆناغی هاوبەشی دوولایەنە.

عەبدولئەمیر رەشید یارەڵا باسی لەوەشکردووە، سێ لیژنە پێکهێنراون کە پەیوەندییان بە هەڵسەنگاندنی مەترسییەکانی سەر عێراق و گۆڕەپانەکانی ئۆپەراسیۆن و تواناکانی هێزە ئەمنییەکانی عێراقەوە هەیە و لیژنەی باڵاش هەر 15 رۆژ جارێک کۆبوونەوەیەک ئەنجام دەدات بە ئامانجی کۆتاییهێنان بە ئەرکی هاوپەیمانیی نێودەوڵەتی.

جەختیشی کردووەتەوە، “تێڕوانینی عێراق بەجۆرێکە دەیەوێت بەتەواوەتی کۆتایی بە ئەرکی هاوپەیمانییەکە بهێنێت و دیاریکردنی سنوورێکی کاتییە بۆ کۆتاییهێنان بە ئەرکی هاوپەیمانی بەتەواوەتی لەکاتێکدا هەنگاو دەنێت بۆ قۆناغی هاوبەشی دووقۆڵی و بەگوێرەی یاداشتەکانی لێکتێگەیشتنی نێوان وەزارەتی بەرگریی عێراق و ژمارەیەک وڵاتی ناو هاوپەیمانی.”