ئەو غازەی عێراق لە ئێرانەوە هاوردەی دەكات بەمەبەستی كارپێكردنی وێستگەكانی كارەبا، كەمبووەتەوە و ئەوەش بەرهەمهێنانی كارەبای بەڕێژەی 35% كەمكردووەتەوە، چارەسەركردنیشی پێویستی بە كەمكردنەوەی نەوتی هەناردەكراوی عێراقە.
بەهۆی زیادبوونی خواست لەسەر غاز لە ناوخۆی ئێراندا، بڕی ئەو غازەی عێراق لەو وڵاتەوە هاوردەی دەكات بەڕێژەی 85% كەمبووەتەوە، ئەوەش سووتەمەنی لەو وێستگانەی كارەبا بڕیوە كە بە غاز كاردەكەن و بڕی كارەبای بەرهەمهێنراو حەوت هەزار مێگاوات كەمیكردووە كە دەكاتە ڕێژەی 35%ی كارەبای عێراق.
بۆ چارەسەركردنی كێشەكە و قەرەبووكردنەوەی ئەو كورتهێنانەی لە غازدا دروستبووە، لەدوایین كۆبوونەوەی ئەنجومەنی وەزیرانی عێراقدا، مستەفا كازمی سەرۆك وەزیران فەرمانیكردووە نەوتی خاو و سووتەمەنیی شل بۆ كارپێكردنی وێستگەكانی بەرهەمهێنانی كارەبا بەكاربهێنرێن.
ماوەی چەند مانگێكە هەناردەی ڕۆژانەی نەوتی عێراق 250 هەزار بەرمیل كەمیكردووە بەهۆی كەمبوونەوەی غازەكەی ئێران و بەكارهێنانی نەوت و سووتەمەنیی شل بۆ كارپێكردنی وێستگەكانی بەرهەمهێنانی كارەبا.
ئەو بڕە لە نەوت دەكاتە ڕێژەی 7%ی نەوتی هەناردەكراوی عێراق و ڕۆژانە زیانی 20 ملیۆن دۆلار لە داهاتی عێراق دەدات كە مانگانە دەكاتە 600 ملیۆن دۆلار.
