قوباد تاڵەبانی، جێگری سەرۆك وەزیران پێشوازیكرد لە سنچۆل لیم، كونسوڵی گشتیی كۆریای باشوور لە هەرێمی كوردستان و پێكەوە تاوتوێی چەند بابەتێكی جێی بایەخی هەردوولایان كرد.
لە كۆبوونەوەكەدا گفتوگۆكرا لەبارەی چۆنییەتی پەرەپێدانی پەیوەندییەكانی نێوان هەردوو وڵات لە بوارەكانی تەكنەلۆژیا و پیشەسازی و گەشتیاری و ئاڵوگۆڕی بیروڕاش كرا لەبارەی چۆنییەتی سوود وەرگرتنی هەرێم لە ئەزموونی سەركەوتووی گەشەسەندنی ئابوریی كۆریای باشوور.
لە بەشێكی دیكەی كۆبوونەوەكەدا گفتوگۆكرا لەبارەی گرنگیی هەمەجۆركردنی ئابوریی هەرێمی كوردستان و پشتبەستن بە توانای گەنجان لە بوارەكانی داهێنان و تەكنەلۆژیا.
لەمبارەیەوە قوباد تاڵەبانی تێڕوانینی خۆی لەبارەی باشكردنی پرۆسەی حكومڕانی و پێشخستنی ئابوریی هەرێمی كوردستان خستەڕوو، داواشیكرد كۆریای باشوور هاوكاریی زیاتری هەرێمی كوردستان بكات بەتایبەتی لە رێگای بەشداریكردنی شارەزایی و ئەزموونی سەركەوتووی ئەو وڵاتە.
