وتەبێژی پۆلیسی پارێزگای هەڵەبجە ڕایگەیاند، تەرمی گەنجێكی تەمەن 25 ساڵ لەلایەن تیمەكانیانەوە دۆزراوەتەوە كە لە شاخەوە كەوتووەتە خوارەوە.
بەرزان عوسمان، وتەبێژی بەڕێوەبەرایەتیی پۆلیسی پارێزگای هەڵەبجە، لە ڕاگەیەندراوێكدا ئاماژەی بەوەكردووە، پاشنیوەڕۆی ئەمڕۆ تەرمی هاوڵاتییەک بەناوی “نعمەت سدیق” كە تەمەنی 25ساڵە و دانیشتووی ناحیەی خورماڵە دۆزراوەتەوە.
باسی لەوەشكردووە، گەنجەكە لەشاخی “وشکەناو” لە سنووری ناحیەی خورماڵ دۆزراوەتەوە، کە کەوتووەتە خوارەوە لەشاخەکەوە.
ڕوونیشیكردووەتەوە، تەرمەکەی لەلایەن تیمی بەڵگە و تاوان، بنکەی پۆلیسی خورماڵەوە هەڵگیراوەتەوە و ڕەوانەی پزیشکی دادی هەڵەبجە کرا بۆ زانینی هۆکاری گیانلەدەستدانەکەی.
وتەبێژی پۆلیسی هەڵەبجە ڕاشیگەیاندووە، دۆسیەی لێکۆڵینەوە لە بنکەی پۆلیسی خورماڵ كراوەتەوە.
