وەزیری كاروباری ئیسلامیی سعودیە دەڵێت، بڵندگۆی مزگەوتەكان پێویستە تەنها بۆ نوێژخوێنانی ناو مزگەوت بێت.
عەبدوللـەتیف ئال شێخ، وەزیری كاروباری ئیسلامی و بانگەواز و رێنمایی رایگەیاند، خوێندنی قورئان بە بڵندگۆ تەنها بۆ نوێژخوێنانی مزگەوت دەبێت. سكاڵایان لە پیاوان و ژنانی بەتەمەن پێگەیشتووە، كە ناڕازین بەرامبەر بەرزیی دەنگ و خەویان تێكدەدات.
ئەوەشی وت، یەكێك لە مەبەستەكانی شەریعەت “گەیاندنی قورئان خوێندنە بۆ ئەوانەی لە نوێژ ئامادەدەبن”.
ئەو وتانەشی لەمیانەی پرسیارێكدا بوو لەبارەی ئەگەری چاوخشاندنەوە بە بڕیاری سەرلەنوێ كارپێكردنی بڵندگۆكان لە مانگی رەمەزاندا.
دەربارەی وتەی هەندێك بەوەی گوێگرتنیان لە قورئان، هەستی “رۆحانیەت”یان دەبزوێنێت، وەزیر وتی، “رۆحانیەت بە هاواركردن لە مایكرۆفۆنەكانەوە نابێت، رۆحانیەت ئەوەیە بۆ نوێژكردن بچیت بۆ مزگەوت”.
دووپاتیشیكردەوە، لە ئایاری 2021ەوە بڵندگۆكان تەنها بۆ بانگدان و نوێژدابەستن بەكاردەهێندرێن.
وەزارەتەكە ئەوكات بڕیارێكی دەركرد بە سنوورداركردنی بەكارهێنانی بڵندگۆی دەرەكیی مزگەوتەكان تەنها بۆ بانگدان و نوێژدابەستن، ناشبێت ئاستی دەنگی بڵندگۆ لە ئامێری رێكخەرەكەیدا لە سێ پلە زیاتربێت.
هەروەها وەزارەتەكە گشتاندنێكی كردووە بۆ دانانی بڵندگۆ بۆ گواستنەوەی دەنگی ئیمام لە نوێژی هەینی و جەژنەكانی (رەمەزان و قوربان) بۆ ریزی ئەو نوێژخوێنانەی بەهۆی قەرەباڵغییەوە دەكەونە دەرەوەی مزگەوتەكان، بۆ گەیشتنی دەنگ پێیان.
