جێگری سەرۆك وەزیران لە دیدارێكدا لەگەڵ كونسوڵی ئەمریكا رایدەگەیەنێت، ناکرێت چیتر سەروەریی خاکی عێراق و هەرێمی کوردستان لەژێر هیچ پاساو و بیانوویەکدا پێشێلبکرێت.
قوباد تاڵەبانی، جێگری سەرۆک وەزیران ئەمڕۆ لە هەولێر پێشوازیکرد لە مارک سترۆ، کونسوڵی گشتیی ئەمریکا لە هەرێم.
لە کۆبوونەوەکەدا کونسوڵی گشتیی ئەمریکا هاوسۆزی و هاوخەمی وڵاتەکەی بۆ حکومەت و هاوڵاتییانی هەرێم دەربڕی لەپای هێرشەکەی شەوی رابردوو بۆ سەر شاری هەولێر.
قوباد تاڵەبانی ئاماژەی بەوەدا، ناکرێت چیتر سەروەریی خاکی عێراق و هەرێمی کوردستان لەژێر هیچ پاساو و بیانوویەکدا پێشێلبکرێت. وتیشی، “ئەم جۆرە هێرشانە سەقامگیریی ناوچەکە دەخەنە مەترسییەوە و ئاڵۆزییەکان زیاتر دەکەن”.
جێگری سەرۆک وەزیران لەگەڵ ئیدانەکردنی هێرشەکەش رایگەیاند؛ بۆ ئەوەی ئەم جۆرە هێرش و پێشێلکارییانە بەشێوەیەکی هەمیشەیی کۆتایی پێبهێنرێت، پێویستە هێزە سیاسییەکانی کوردستان پێکەوە هەڵوێستێکی یەکگرتوویان هەبێت. داواشیکرد هەردوو حکومەتی هەرێم و حکومەتی فیدراڵ پێکەوە کاربکەن بۆ گرتنەبەری هەموو رێوشوێنێکی پێویست بۆ پاراستنی سەرەوەریی خاکی عێراق و هەرێمی کوردستان.
هەر لە کۆبوونەوەکەدا قوباد تاڵەبانی ئاماژەی بەوەدا، هەر وڵاتێکی دراوسێ نیگەرانییەکی هەیە پێویستە لەڕێگەی گفتوگۆ و بەشێوەیەکی ئاشتییانە کێشەکان چارەسەربکرێن، نەک لە رێگەی شەڕ و بۆردومانکردنی خاکی هەرێم.
