پڕۆسەی دەنگدان بۆ هەڵبژاردنی دەستەی سەرۆکایەتی و ئەندامانی ئەنجومەن لە تایوان دەستیپێکرد و زیاتر لە 19 ملیۆن هاوڵاتی تایوانی مافی دەنگدانیان هەیە.
کۆمسیۆنی هەڵبژاردنەکانی تایوان ئاماژەی بەوە کردوە، “کاتژمێر 8:00 بەکاتی ناوخۆ دەرگای بنکەکانی دەنگدانیان بەڕووی هاوڵاتیاندا کردووەتەوە، هاوکات ئەمساڵ لە کۆی 23 ملیۆن و 400 هەزار هاوڵاتی، 19 ملیۆن و 500 هەزار کەسیان مافی دەنگدانیان هەیە و هەر کەسێک کە تەمەنی لە سەرووی 20 ساڵەوە بێت دەتوانێت بەشداری دەنگدان بکات”.
هەر دەنگدەرێک سێ وەرەقەی دەنگدان وەردەگرێت، دوانیان بۆ هەڵبژاردنی سەرۆکی کارگێڕی تایوان و جێگرەکەیەتی و یەکێکی دیکەشیان دەنگدان بە کاندیدەکان بۆ پۆستی نوێنەری پەرلەمان کە بە یوانی ئەندامان ناسراوە لەسەر لیستی حزبەکان.
پڕۆسەی دەنگدان هەشت کاتژمێر دەخایەنێت و وێستگەکانی دەنگدان لە کاتژمێر 4:00 بە کاتی ناوخۆی ئەو وڵاتە دادەخرێن، هەروەها سێ کاندید کێبڕکێ لەسەر پۆستی سەرۆکی کارگێڕی تایوان دەکەن.
بە گشتی 113 کورسی لە یوانی ئەنداماندا هەیە، کە باڵاترین ئەنجومەنی ئەو وڵاتەیە و ئەندامێتی ئەندامانی ئەو ئەنجومەنە ماوەی چوار ساڵ دەخایەنێت و دواتر جارێکی دیکە هەڵبژاردن ئەنجامدەدرێت.
