پاش نیوەڕۆی ئەمڕۆ گوندێكی سنووری چەمچەماڵ بۆردومانكرا، ئەمەش دوای ئەو بۆردومانانە دێت كە بەیانیی دوێنێ گوندێكی دیكەی سنوورەكەی گرتەوە.
رەمك رەمەزان، قائیمقامی قەزای چەمچەماڵ بە تۆڕی میدیایی ئێستای راگەیاند، كاتژمێر 2ی پاش نیوەڕۆی ئەمڕۆ لەلایەن فڕۆكەی بێفڕۆكەوانەوە گوندی چنارتوو-ی سەر بە ناحیەی ئاغجەلەر بۆردومانكرا.
وتیشی، “ئەوە دووەم جارە لەماوەی ئەمساڵدا گوندەكە بۆردومان دەكرێت، پاش بۆردومانەكەی مانگی ئابی ئەمساڵ”.
زەرەر و زیانەكانی بۆردومانەكە هێشتا نەزانراوە، بەهۆی ترس لە نزیكبوونەوەی شوێنی بۆردومانەكە، رەمك رەمەزان وای وت.
ئەوەشی خستەڕوو، پاراستنی خاك و سەروەری لە ئەستۆی حكومەتی عێراقدایە، بۆیە داوادەكەن حكومەتی ناوەند بە ئەركی خۆی هەڵستێت بەمەبەستی پاراستنی گوندەكان، تا گوندنیشینان بتوانن بچنەوە گوندەكانیان، كە لەئێستادا بەهۆی بۆردومانەكانەوە چۆڵكراون.
قائیمقامی چەمچەماڵ روونیشیكردەوە، لە دوێنێوە ئەمە حەوتەم بۆردومانی ناوچەكەیە، پاش ئەوەی دوێنێ گوندی توتەقەڵ-ی سنووری ئاغجەلەر چوار جار و، گوندی سەیدان لە سنووری قەرەهەنجیر دوو جار بۆردومان كران.
