ئەمشەو، چوارشەممە لە چوارچێوەی ڕوبەڕوبوونەوەکانی هەفتەی 16ی خولی پلە یەکی ئیسپانیا، یانەی ڕیاڵ مەدرید یەکسانبوونی بەرانبەر ئیڵچی تۆمارکرد.
ڕیاڵ مەدرید لە یاریگای مانوێل مارتینێز ڤالێرۆ بووە میوانی یانەی ئیڵچی و یاری نێوانیان بە ئەنجامی یەکسانبوون (1-1) کۆتاییهات.
لە سەرەتاکانی تایمی یەکەم ئەستێرەکانی مێرەنگی گوشاری توندیان دروستکرد و چەندین هەلی مەترسیداریان ڕەخساند، لە خولەکی 20 لوکا مۆدریچ گۆڵێکی ناوازەی تۆمارکرد و ئەو تایمە بە گۆڵێکی بێوەڵام کۆتاییهات.
لە تایمی دووەمدا ئەستێرەکانی زێدان هێرشەکانیان چڕتر کرد، بەڵام ئەوەی ڕوویدا چاوەڕواننەکراوبوو و لە خولەکی 52 فیدیڵ شاڤێز بە لێدانی سزا گۆڵی یەکسانکەرەوەی ئەنجامەکەی بۆ ئیڵچی تۆمارکرد.
https://streamable.com/yh89zt
سەرەڕای ئەوەی لە کۆتا ساتەکاندا یاریزانانی لۆس بلانکۆس هەوڵی بێوچانیاندا بۆ تۆمارکردنی گۆڵی پێشەنگی، بەڵام سەرکەوتوو نەبوون و یارییەکە بە یەکسانبوون (1-1) کۆتاییهات.
بەپێی ئەنجامە تۆمارکراوەکە، ڕیاڵ مەدرید بە کۆکردنەوەی (33) خاڵ لە پلەی دووەمی ریزبەندی یانەکانی لالیگا و جیاوازی دوو خاڵ لەگەڵ ئەتلەتیکۆ مەدرید ماڵئاواییان لە ساڵی 2020 کرد.
