ڕۆژی هەینی ڕابردوو، بەهۆی ئەوەی پشوو بوو، بەشێک لە خەڵکی تاران ڕویان لە دەرەوەی شار کرد، ئەگەرچی هەوا زۆر سارد بوو، کۆمەڵێک لە شاخەوانەکان خۆیان گەیاندووەتە شاخەکانی نزیکی تاران و لەوێ بەهۆی بەفری زۆرەوە 12 کەسیان لێ ڕەقبووەتەوە.
ڕۆژی هەینی ڕابردوو، ٢٥ی کانونی یەکەم، بەڕێوبەرایەتی کەشناسی تاران هۆشداری دابووە دانیشتوانی تاران کە لە بەرزاییەکانی دەوروبەری ئەوشارە لەوانە بەهمەن و کولاک و ئالبۆرز لە باکوری تاران، بەفر دەبارێت و شیاو نییە ڕۆشتن بۆ ئەو ناوچانە، بەڵام بەشێک لە شاخەوانان ڕۆشتن و لەوێ بەهۆی کەمبونەوەی مەودای بینین و سەرماوە بەشێکیان تەرمەکانیان دۆزراوەتەوە و بەشێکی دیکەشیان چارەنوسیان نادیارە.
ڕێکخراوی مانگی سوری ئێران- سنوری تاران ئاشکرایکردووە، “تا ئێستا تەرمی 12 کەسمان دۆزیوەتەوە کە ڕەقبوونەتەوە و ئەگەری هەیە لە ناوچەی کلکچالیش کەسانی گیرخواردوو هەبن.
لەگەڵ هێنانەوەی تەرمەکاندا، ڕێکخراوی مانگی سوری ئێران ئەو کەسانەشی ڕزگارکردووە کە لەسەرمادا لەو ناوچەیە ماونەتەوە و پێویستی زۆریان بە هاوکاری خێرا هەبووە.
لە ئێوارەی ڕۆژی هەینیدا نزیکەی 100 کەس لە وەرزشەوان و شاخەوانەکان کە لە تارانەوە گەشتیان بۆ بەرزاییەکان کردبوو گیریان خواردبوو، بەڵام بەشێکیان توانیان خۆیان ڕزگاربکەن و بەشێکی دیکەیان بەهۆی کەمبوونەوەی مەودای بینین و بارینی بەفری زۆرەوە ڕێگەیان لێتێکچووە و ڕەقبوونەتەوە.
