باڵیۆزی سوریا لە مۆسکۆ ڕایگەیاند، هەواڵێک بڵاوکراوەتەوە کە گوایە بەشار ئەسەد و خێزانەکەی گواستراونەتەوە بۆ ڕوسیا بۆ چارەسەر، بەڵام ئەو هەواڵانە دورن لە ڕاستییەوە.
ڕیاز حەداد، باڵیۆزی سوریا لە روسیا ئەمڕۆ 13ی ئازار بە ئاژانسی تاسی ڕاگەیاندووە، “توشبوونی بەشار ئەسەد و خێزانی بە ڤایرۆسی کۆرۆنا بشتڕاستکراوەتەوە و دوای ئەوە لە دیمەشق خۆیان کەرەنتینەکردووە و تەندروستیان باشە”.
بە پێی زانیارییەکانی حەداد، بەشار ئەسەد و خێزانی لە دیمەشق دەمێننەوە تا تێپەڕاندنی ڤایرۆسەکە، چونکە تەندروستیان باشە و هیچ مەترسییەک لەسەر ژیانیان دروست نەبووە.
هەفتەیەکە نوسینگەی سەرۆککۆماری سوریا ڕایگەیاندووە، “بەشار ئەسەد و ئەسمای خێزانی ئەنجامی پشکنینەکەیان بۆ ڤایرۆسی کۆرۆنا پۆزەتیڤ دەرچووە و خۆیان کەرەنتینە کردووە”.
پێشتریش دیمتری پسکۆڤ، وتەبێژی کۆشکی سەرۆکایەتی ڕوسیا “کرملین” بێ ئاگای خۆی نیشاندابوو لەوەی حکومەتی سوریا داوای هاوکاریی تەندروستی کردبێت دوای توشبوونی بەشار ئەسەد و خێزانەکەی بە ڤایرۆسی کۆرۆنا.
