وەزارەتی پەروەردە ژمارەیەك بڕیار و رێنمایی ئاراستەی بەڕێوەبەرایەتییەكانی پەروەردە تایبەت بە گواستنەوەی خوێندكاران دەركردووە یەكێك لە رێنماییەكاندا بۆ شۆفێران هاتووە كەخوێندكاران دەگوازنەوە، “نابێت رێگەیان پێبدەن دەست لە جامی ئۆتۆمبێلەكان دەربهێنن و نابێت دەنگی تەسجیلی ئۆتۆمبێلەكان بەرزبێت كە خوێندكاران رەفتار و پەیامی ناپەروەردەیی و نەگونجاو بكەن”.
بەپێی نووسراوێكی وەزارەتی پەروەردەی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە كە پێویستە شۆفێری ئەو پاس و تەكسییانەی كە منداڵانی باخچە و خوێندكاران دەگوازنەوە ساڵنامەی ئۆتۆمبێل و مۆڵەتی شۆفێری و كارتی زانیاری پێشكەش بە كارگێریی ناوەندییەكانی خوێندن بكەن.
لە راگەیەندراوەكەدا هاتووە، هەر شۆفێرێك پابەند نەبوو بە رێنماییەكانی هاتوچۆوە و سكاڵای لەسەركرا پاش ساغبوونەوەی راستییەكان بەڕێوەبەری پەروەردەی پارێزگا و ئیدارە سەربەخۆكان داوا لە لیژنەكانی قائیمقامیەت بكەن رێگەیان پێنەدرێت كاری گواستنەوەی خوێندكاران بكەن.
ئاماژە بۆ ئەوەش كراوە، شۆفێران نابێت رێگە بە خوێندكاران بدەن دەست لە جامی ئۆتۆمبێلەكان دەربهێنن و نابێت دەنگی تەسجیلی ئۆتۆمبێلەكان بەرز بێت كە خوێندكاران رەفتار و پەیامی ناپەروەردەیی و نەگونجاو بكەن”.
