دەربارەی پرسی دامەزراندنی سێ یەکەمەکانی هەرێم، کۆبوونەوەیەک ئەنجامدرا و بڕیاردرا ڕێکارە یاسایی و کارگێری و تەکنیکییەکان خێراتر بکرێن.
ئەمڕۆ پێنجشەممە، وەزارەتی خوێندنی باڵاو توێژینەوەی زانستی رایگەیاند، کۆبوونەوەیەک لە نێوان د.ئارام محمد قادر وەزیرى خوێندنى باڵا و توێژینەوەى زانستى هەرێم، لەگەڵ محمود محمد عەبد سەرۆکى ئەنجومەنى ڕاژەى عێراق دەربارەی پرسی دامەزراندنی سێ یەکەمەکان ئەنجامدرا.
دەشڵێت، “ناوەرۆکی کۆبوونەوەکە دەربارەی پرسى دامەزراندنى سێ یەکەمەکان و هەڵگرانى بروانامە باڵاکان بووە، کە تیایدا بڕیاردراوە بە خێراترکردنی ڕێکارە یاسایی و کارگێڕی و تەکنیکییەکانى نێوان لایەنە پەیوەندیدارەکانی هەردوولا بۆ جێبەجێکردنی بڕیارەکە و سوودوەرگرتن لە توانای دەرچووەکان”.
لە هەرێمی کوردستان، ژمارەی سێ یەکەمەکان نزیکەی 10 هەزار کەس دەبن و ماوەی چەند ساڵێکە دامەزراندیان لەلایەن حکومەتی هەرێمەوە راگیراوە.
