بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان چاویكەوت بە نوێنەری خاوەنی ئۆتۆمبێلە بێسەرەتاكان.
لە سەرەتای كۆبوونەوەكەدا نوێنەری خاوەنی ئۆتۆمبێلە بێسەرەتاكان لە راپۆرتێكدا كێشە و داواكارییەكانیان خستەڕوو و راشیانگەیاند، پابەندی رێنمایی و رێكارە یاسایی و ئەمنییەكان دەبن و هاوكاری تەواوی دەزگای ئاسایش و سەرجەم دامەزراوەكان دەبن بۆ پاراستنی ئارامیی سلێمانی.
لە بەرامبەردا سەرۆك بافڵ جەلال تاڵەبانی پشتیوانیی خۆی بۆ سەرجەم چین و توێژەكانی كۆمەڵگە دووپاتكردەوە و ئاماژەی بەوەكرد، “خۆمان بە پارێزەری سەرجەم خەڵكی كوردستان دەزانین بەهەموو چین و توێژەكانییەوە، ئەركی ئێمە پاراستنی ماف و بژێویی ژیانی خەڵكە و رێگانادەین غەدر و ناحەقی بەرامبەر هیچ كەسێك بكرێت”.
سەرۆك بافڵ وتیشی، “لەگەڵ سەرجەم لایەنە پەیوەندیدارەكان و دەزگا ئەمنییەكان هەماهەنگ دەبین تاوەكو لەچوارچێوەی یاسا و رێكارەكاندا كێشەی ئۆتۆمبێلە بێسەرەتاكان چارەسەربكرێت، بێگومان پابەند بە رێنماییەكانی هاتوچۆ و ئاسایش ئەم كارە دەكرێت و دەبێت یاسا وەك یەك بەسەر هەموواندا جێبەجێبكرێت.
لەكۆتایی كۆبوونەوەكەشدا سەرۆك بافڵ رایگەیاند، “نابێت لە كوردستاندا مافی هیچ توێژێكی كۆمەڵگە پێشێلبكرێت و نادادییان بەرامبەر بكرێت، پشتیوانیی هەمووان دەبین و هەرێمێكمان دەوێت تێیدا هەمووان هەست بە ئارامی و پارێزراوی بكەن و رێز لە مافەكانیان بگیرێت”.
