بڕیارە ئەنجومەنی وەزیرانی عێراق کۆببێتەوە بۆ بڕیاردان لەبارەی ناردنی پارە بەشێوەی قەرز بۆ هەرێمی کوردستان، پەرلەمانتارێکی عێراقی دەڵێت لەوبارەیەوە سکاڵا تۆماردەکەم و رێگری لێدەکەم، ئەندام پەرلەمانێکی کوردیش لە ئەنجومەنی نوێنەران دەڵێت، “ئەوە تەنها موزایەدەیە”.
مستەفا سەنەد ئەندامی ئەنجومەنی نوێنەرانی عێراق، دوای رێککەوتنی شاندی هەرێمی کوردستان و حکومەتی عێراق بۆ پێدانی قەرز بە هەرێمی کوردستان، لە تۆڕی کۆمەڵایەتیی ئێکس، رایگەیاند، لە دادگای فیدراڵی سکاڵا تۆماردەکەم و رێگری لە پێدانی قەرز دەکەم بە هەرێمی کوردستان”.
پەرلەمانتارەکە دەڵێت، “ئەو بڕیارە لەدەرەوەی یاسای بودجەیە و سکاڵا لەسەر ئەنجومەنی وەزیرانی عێراق تۆماردەکەم”.
لەوبارەیەوە کاروان یاروەیس ئەندامی ئەنجومەنی نوێنەرانی عێراق بە تۆڕی میدیایی ئێستای راگەیاند، “بەشێک لە پەرلەمانتارانی عێراقی بۆ راکێشانی هەست و سۆزی هاوڵاتییان و شەقامی خۆیان ئەم جۆرە بانگەشانە دەکەن، بەتایبەتی ئێستا نزیکین لە هەڵبژاردنەکانەوە”.
باسی لەوەکرد، “هەر ئەندامێکی ئەنجومەنی نوێنەران دەتوانێت سکاڵا لەوبارەیەوە تۆمار بکات لە دادگای فیدراڵی و ئەوە بابەتێکی ئاساییە، بەڵام پێدانی قەرز بە هەرێمی کوردستان لەلایەن حکومەتی عێراقەوە، تەواو یاسایی و دەستوورییە بۆیە کەس ناتوانێت رێگری لێبکات”.
ئاماژەی بۆ ئەوەشکرد کە ئەو پارەیە بە قەرز رەوانە دەکرێت تاوەکو ئەوکاتەی هەرێمی کوردستان و عێراق لەبارەی پشکی هەرێمەوە دەگەنە رێککەوتن، دواتر ئەو قەرزانە پاکتاو دەکرێت.
لە دوو رۆژی رابردوودا شاندی هەرێمی کوردستان و حکومەتی عێراق گەیشتنە رێککەوتن لەبارەی ناردنی بڕی 800 ملیار دیناری عێراقی بەشێوەی مانگانە وەک قەرز، ئەوەش پێویستی بەوەیە لە ئەنجومەنی وەزیرانی عێراق کە بڕیارە سبەینێ یەکشەممە کۆببێتەوە پەسەند بکرێت و بڕیاری لەبارەوە بدرێت.
