توێژینەوەیەكی نوێ كە CNN ئەنجامەكەی بڵاوكردووەتەوە ئاشكرایدەكات كە هەندێك خوو و بژاردە دەكرێت مرۆڤ ئەنجامیبدات بۆ زیادكردنی تەمەنی بە نزیكەی 24 ساڵ.
توێژینەوەكە گۆڕانكاریی لە شێوازی ژیان لەخۆگرت كە دەكرێت مرۆڤ بیانگرێتەبەر تەنانەت لە كاتێكی درەنگی ژیانیدا، بۆ نمونە لە تەمەنی 40 ساڵییەوە و دەڵێت، كەسێك لە تەمەنی 50 ساڵیدا دەتوانێت تەمەنی بۆ ماوەی 21 ساڵ درێژبكات ئەگەر ئەو گۆڕانكارییانە ئەنجامبدات، ئەو زیادبوونە 18 ساڵ دەبێت لە تەمەنی 60 ساڵیدا.
تۆڕە میدیاییەكە لە زاری خوان مای نگوین، ئامادەكاری توێژینەوەكەوە دەڵێت، درێژكردنی تەمەن تەنانەت بۆ ئەو كەسانەش دەبێت كە بەدەست نەخۆشیی درێژخایەنەوە دەناڵێنن، بەمەرجێك دەست بەو گۆڕانكارییانە بكەن.
توێژینەوەكە گۆڕانكارییەكانی لە شێوازی ژیان بۆ هەشت دانە دابەشكردووە كە بریتین لە، ئەنجامدانی وەرزش، خواردنی خۆراكی تەندروست، كەمكردنەوەی دوودڵی، خەوی باش، پتەوكردنی پەیوەندییە كۆمەڵایەتییە ئەرێنییەكان، دووركەوتنەوە لە جگەرە و نێرگەلەكێشان، دووركەوتنەوە لە ماددە هۆشبەرەكان و نەخواردنەوەی خواردنەوە كحولییەكان بە بڕی زۆر.
نگوین وتی، “چەندێك ئەو هەنگاوانە زووتر بێت باشترە، بەڵام ئەگەر گۆڕانكارییەكی بچوك و سادەیش بكەیت لە چلەكان یان پەنجاكان یان شەستەكانی تەمەندا، ئەو گۆڕانكارییە هەر سوودبەخش دەبێت، لەكاتێكدا گۆڕانەكە سادە و ئاسانە بۆ زۆرینەی خەڵك”.
بە وتەی ئەو، گرتنەبەری تەنها یەك خووی تەندروست لەو هەشت دانەیە بۆ پیاوێك لە تەمەنی 40 ساڵیدا دەبێتەهۆی زیادبوونی 4.5 ساڵ تەمەن، زیادكردنی خووی دووەم حەوت ساڵی دیكە بۆ تەمەن زیاددەكات.
لەكاتێكدا پەیڕەوكردنی سێ لەو خووانە تەمەنی پیاو بە بڕی 8.6 ساڵ زیاد دەكات.
بۆ ژنانیش هەمان هەڵسوكەت هۆكار دەبێت بۆ زیادبوونی تەمەنیان، گرتنەبەری هەر هەشت خووەكە 22 ساڵ بۆ تەمەنی ژنان زیاددەكات.
راهێنانە وەرزشییەكان بووەتەهۆی كەمبوونەوەی مەترسیی مردن بە رێژەی 46% بەراورد بەو كەسانەی وەرزشیان نەكردووە.
بەپێی توێژینەوەكە دووركەوتنەوە لە هۆگربوون بە ماددە ئەفیونییەكان دووەم گرنگترین هۆكاربووە بۆ تەمەنێكی درێژتر، هەروەك مەترسیی مردنی پێشوەختەی بە رێژەی 38% كەمكردووەتەوە.
نەكێشانی جگەرە و نێرگەلە بەهیچ جۆرێك، مەترسیی مردنی بە رێژەی 29% كەمكردووەتەوە، هەروەك جگەرە كێشەكانیش سوودی بێشوماریان پێگەیشتووە تەنها بە وازهێنان لێی، بەپێی توێژینەوەكە.
كەمكردنەوەی دوودڵی بووەتەهۆی كەمكردنەوەی مردن بە رێژەی 22%، لەكاتێكدا پەیڕەوكردنی سیستمی خۆراكیی رووەكی بووەتەهۆی زیادبوونی هەلی ژیانێكی درێژتر بە رێژەی 21%.
