بەهۆی لیۆنێل مێسی-یەوە، پێگەکانی یانەی ئینتەر مەیامی لە تۆڕە کۆمەڵایەتییەکان 10 هێندە زیادیکردووە.
دەیڤید بێکهام، خاوەن پشک و سەرۆکی یانەی ئینتەر مەیامی دەڵێت، “ئەو شەوەی مێسی-مان بە هاندەران ناساند، ڤیکتۆریای هاوسەرەم وتی، سەیرە بەڕاستی، کەسێک چۆن دەتوانێت ئەو هەموو خەڵکە بەو جۆرە شادمان بکات، ئەوان مەبەستیان من نەبوو، مەبەستیان لیۆ مێسی بوو.”
پێدەچێت خۆشی و شادی ئینتەر مەیامی لە ڕووی بزنسەوە بە هەمانشێوە بێت.
ئینستاگرامی ئینتەر مەیامی پێش مێسی تەنها ملیۆنێک “فۆڵۆوەر”ی هەبووە، لەوەتەی مێسی چووەتە یانەکە، ڕێژەکە بۆ 10 ملیۆن زیادیکردووە.
لە تویتەر تەنها 176 هەزار “فۆڵوەر”یان هەبووە، لە ئێستادا گەیشتووەتە 696 هەزار.
لە فەیسبووک تەنها 600 هەزار “فۆڵۆوەر”یان هەبووە، دوای مێسی ڕێژەکە گەیشتووەتە نزیکی دوو ملیۆن.
