قوباد تاڵەبانی، لەكۆبوونەوەیدا لەگەڵ مەكتەبی رێكخستنی (ی.ن.ك) رایگەیاند، یەكێتی پێگەیەكی گەورەی هەیە، بۆیە هەمیشە چاوەڕوانی باشتری لێدەكرێت و بۆ ئەو مەبەستەش خۆمان رێكدەخەینەوە.
لە كۆبوونەوەكەدا كە ئەمڕۆ لە شاری سلێمانی بەڕێوەچوو و سەركەوت زەكی لێپرسراوی مەكتەبی رێكخستن ئامادەیبوو، قوباد تاڵەبانی سەرپەرشتیاری مەكتەبی سكرتارییەتی سەرۆك مام جەلال دوایین گۆڕانكاریی و پێشهاتە سیاسییەكان و دۆخی ناوخۆی یەكێتی بۆ ئامادەبووان روونكردەوە.
لە سەرەتای كۆبوونەوەكەدا، سەركەوت زەكی، رووناكی خستەسەر كار و چالاكییەكانی مەكتەبی رێكخستن و گرفتەكانی بەردەم كارەكانیان و ئاماژەی بەوەدا كە پلانیان داناوە و ئامادەكارییان كردووە بۆ چۆنییەتی خۆگونجاندن لەگەڵ ئەم قۆناغە نوێیە بە شێوازێك كە لە ئاستی چاوەڕوانیی كادری حزب و خەڵكی كوردستاندا بێت، جەختیشیكردەوە جێبەجێكاری پلان و سیاسەتەكانی سەرۆك بافڵ تاڵەبانی دەبین لەپێناو باشتر بەڕێوەبردنی یەكێتی.
دواتر قوباد تاڵەبانی باسی دۆخی ناوخۆی یەكێتی كرد و رایگەیاند، گۆڕانكاری دەكەین لە شێوازی كاركردن بە جۆرێك كە لەگەڵ ئەم دۆخەی ئێستادا گونجاو بێت و بۆ ئەو مەبەستەش پێویستیمان بە هەوڵ و هیمەتی هەموولایەكە، لەوبارەیەوە وتی، مەكتەبی رێكخستن دڵی حزبە و كاریگەری گەورەی لەسەر ئۆرگانەكان و لەسەر جێبەجێكردنی سیاسەت و بەرنامەی كاری حزب هەیە.
قوباد تاڵەبانی ئاماژەی بەوەشدا یەكێتی سیاسەت و پرەنسیپەكانی نەگۆڕاوە و هەموو كات لەگەڵ عەدالەتی دارایی و پەیوەندییەكی تەندروست بووە لەگەڵ بەغداد و دووپاتیشیكردەوە یەكێتی داڕێژەری فیدراڵییەتە لە عێراق و بونیادنەر و پارێزەری قەوارەی هەرێم و دەستكەوتەكانییەتی، ئەمەش تاكە رێگەیە بۆ خزمەتكردنی هاوڵاتییان و زامنكردنی مافە دەستوورییەكانی كۆمەڵانی خەڵكی كوردستان.
لەبارەی هەڵبژاردنیشەوە سەرپەرشتیاری مەكتەبی سكرتارییەتی سەرۆك مام جەلال وتی، “لەگەڵ ئەوەدا نەبووین هەڵبژاردن دوابكەوێت و ئێستاش ئامادەكاریی تەواومانكردووە و دەبێت هەڵبژاردن بكرێت، و ئێمە لەگەڵ بەڕێوەچوونی هەڵبژاردنێكی بێگەرد و دادپەروەرانەداین و مافی هەموو پێكهاتەكانیش پارێزراو بێت.
لەبارەی پەیوەندییەكانی یەكێتی لەگەڵ حزب و لایەنە سیاسییەكان، قوباد تاڵەبانی رایگەیاند، ئێمە لەگەڵ یەكڕیزی و تەبایی ناوخۆییداین و هەموو كات وتوومانە دەبێت پەیوەندیی زۆر باشمان لەگەڵ لایەنەكان هەبێت، بەڵام ئەوە بەو مانایە نایەت كە سیاسەتی حزبەكان وەك یەك بێت، هەموو حزبێك سیاسەتی خۆی هەیە و كار لەسەر جێبەجێكردنی دەكات، یەكێتیش سیاسەتی تایبەتی خۆی هەیە و لە رێگای ئۆرگان و كادرەكانییەوە كار لەسەر جێبەجێكردنی دەكات.
