هاوڵاتییەکی کوردی خەڵکی هەرێمی کوردستان لە وڵاتی بەریتانیا لە کاتی رووداوێکدا چەند کەسێک لە مردن رزگاردەکات و بەو هۆیەشەوە بە پیاوە ئازاکەی بەریتانیا ناوی دەهێندرێت.
سەروەر مەحمود گەنجێکی کوردی تەمەن 39 ساڵی خەڵکی شاری کەلارە، ماوەی چەند ساڵێکە لە شاری رێخسامی وڵاتی بەریتانیا پەنابەرە، رۆژی چوارشەممەی رابردوو لە کاتێکدا ئاگر لە باڵەخانەیەکی نیشتەجێبوون دەکەوێتەوە، سەروەر لە نزیک شوێنی رووداوەکە دەبێت و بێ گوێدانە کارەکەی خۆی بەرەو ئاگرەکە رادەکات و 30 کەس رزگاردەکات، کە زۆرینەیان ژن و منداڵ بوون.
پێگەی زە لیدەری بەریتانی راپۆرتێکی لەبارەی ئەو گەنجەوە بڵاوکردووەتەوە بە پیاوە ئازاکە ناوی بردووە.
بەپێی راپۆرتەکە لە کاتی ئاگرەکەدا سەروەر لەبەردەم دوکانەکەی خۆیدا جگەرەی کێشاوە، راستەوخۆ جگەرەکەی کوژاندووەتەوە و دووکانەکەی بە کراوەیی بەجێهێشتووە و بەدەم ئەو کەسانەوە چووە کە لەناو باڵەخانەکەدا گیریان خواردووە.
بە وتەی سەروەر لە کاتی ئاگرەکەدا نەیتوانیوە بیر لە مەترسیداری کارەکەی بکاتەوە تەنها بیری لای ئەو خەڵکانە بووە کە گیریان خواردووە، هەر بۆیە راستەوخۆ رایکردووە بۆ لایان.
