ئانسو فاتی ناوی لە لیستی فرۆشتنی یانەی بەرشلۆنەدایە و یاریزانەکە بە یانەی گەورە نەبێت، قایل نابێت.
بەپێی زانیارییەکانی پۆرتاڵی “دیاریۆ سپۆرت”، ئیدارەی خوان لاپۆرتا لە ئێستادا فشاری لەسەر خۆرخی مێندێزی دروستکردووە تاوەکو بە گواستنەوەی ئانسو فاتی بۆ یانەی وڵڤەرهامپتن قایلبێت، بەڵام یاریزانەکە نایەوێت ئەو هەنگاوە بنێت.
ئیدارەی وڵڤەر بڕی 30 ملیۆن و ڕوبن نیڤێزی پۆرتوگالییان بەرامبەر بە فاتی پێشکەشکردووە، خوان لاپۆرتا و هاوکارانی پێیانوایە هەنگاوێکی باشە و لە یەک کاتدا یاریزانێکی داواکراو دابیندەکەن و بڕێک پارەشیان بۆ گواستنەوەکان دەستدەکەوێت، بەڵام ئانسو فاتی نایەوێت پەیوەندی بەیانەیەکەوە بکات کە لە پلەی (13)ی ڕیزبەندیی پریمەرلیگ-دایە.
سەرچاوەکە نووسیویەتی، هاوشێوەی بابەتی فرینکی دی یۆنگ، لەم هاوینەدا چاوەڕوانی مشتومڕێکی زۆر دەبین لەبارەی ئانسو فاتی-یەوە.
