د. پشدەر عەبدوڵا رایگەیاند، ئەو منداڵەی بەیانی ئەمڕۆ بەهۆی سکچوون و رشانەوەوە گیانیلەدەستدابوو درەنگ گەیەندرابووە نەخۆشخانە و بە چارەسەرکردنی رانەگەیشتوون.
د. پشدەر عەبدوڵا بەڕێوەبەری نەخۆشخانەی د. جەمال ئەحمەد رەشیدی منداڵان بە تۆڕی میدیایی ئێستای راگەیاند، “بەیانی ئەمڕۆ منداڵێکی تەمەن یەک ساڵان دوای تووشبوونی بە سکچوون و رشانەوە گیانیلەدەستداوە”.
ئاماژەی بەوەشکرد، “منداڵەکە پێش ئەوەی بگاتە نەخۆشخانە لە رێگا گیانیلەدەستداوە، ئەوەش بەهۆی وشکبوونەوەی زۆر و درەنگ گەیاندنییەوە بووە بە نەخۆشخانە”.
وتیشی، “سکچوون و رشانەوە یەکێکە لەو نەخۆشییانەی پێویستە بە زووترین کات دایک و باوک منداڵ بگەیەننە نەخۆشخانە و لە وشکبوونەوە رزگاربکرێت چونکە بەهۆی نەخۆشییەکەوە لە ماوەیەکی کەمدا بڕێکی زۆر ئاو لە جەستەی منداڵ دەچێتە دەرەوە”.
