ئەمینداری گشتیی یەكێتیی جیهانیی زانایانی مسوڵمان، لەبارەی هێرشەکانی ئەمدواییەی داعشەوە ڕایگەیاند، ئیدانەی ئەو کردەوە تیرۆرستییانە دەکات و ئەو ڕێکخراوەش بە ڕێکخراوی “گەمژەکان” ناودەبات.
عەلی قەرەداغی، ئەمینداری گشتیی یەكێتیی جیهانیی زانایانی مسوڵمان لەسەر ڕووداوەکان ڕایگەیاند، “ئەو كردەوە قێزەونە بەهەموو پێوانە و بنەمایەكی ئایینی و نیشتمانی و نەتەوەیی و مرۆڤایەتی ئیدانەكراوە” و تێكدانی ئاسایشی كۆمەڵگا خزمەت بە ئیسلام ناكات، خودای گەورە ڕەحم بە هاوڵاتییانی سیڤیل و پێشمەرگەكانمان بكات”.
دكتۆر عەلی قەرەداغی ئاماژەی بەوەشکردووە، “ئێمە شانازی بە ئیسلامەوە دەكەین، هیچ ئازایەتییەكی تێدانییە بۆ ڕێكخراوێكی تیرۆریستیی وەك داعش كە بووەتە داردەست و هۆكاری ئیهانەكردنی مسوڵمانان و هاوكاری دوژمنانی ئیسلام، لەکاتێکدا پێمانوایە، دەوڵەتی داعش ڕێکخراوی گەمژەکان و کوشتنە نەک ڕێکخراوی دین و عەقڵ”.
لە ماوەی چەند ڕۆژێكدا زیاتر لە 20 هاوڵاتی و پێشمەرگە بە دەستی چەکدارانی داعش لە چەند ناوچەیەكی باشووری كوردستان کوژران.
