یانەی مانچستەر یونایتدی ئینگلیزی ئامادەکاری بۆ واژۆکردنی گرێبەستێکی گەورە کردووە، ڕەنگە ببێتە گرانبەهاترینی مێرکاتۆی هاوینی 2023.
ڕۆژنامەکانی “دەیلی مەیڵ” لە بەریتانیا و “بێلد سپۆرت” لە ئەڵمانیا ئاشکرایانکردووە، کە بەڕێوەبەرانی مانچستەر یونایتد دەستیان بە دانوستاندن بۆ واژۆکردنی گرێبەستی ڕانداڵ کۆلۆ موانیی هێرشبەری فەرەنسیی یانەی ئینتراخت فرانکفۆرت کردووە.
بەپێی سەرچاوەکان، فرانکفۆرت ئارەزووی بەدەستهێنانی (105) ملیۆن پاوەند دەکات بەرامبەر کۆلۆ موانی، یانەی مانچستەر یونایتدیش بەهۆی خواستی ئێریک تین هاگەوە کەمتەرخەمی ناکات لە پێشکەشکردنی ئەو بڕە خەیاڵییە.
کۆلۆ موانی لە پێگەکانی هێرشبەری سەرەڕم و باڵی ڕاست یاریدەکات، لەم وەرزەدا (34) یاری لە خول و پاڵەوانێتییە جیاوازەکاندا کردووە، (16) گۆڵ و (14) ئەسیستی تۆمارکردووە.
