ئەندامێکی ئەنجومەنی نوێنەرانی عێراق رایگەیاند، پرۆژەیاسای بودجە هێشتا لە وەزارەتی داراییە و نەگەیشتووەتە ئەنجومەنی وەزیران و لای ئەوان پەسەند نەکراوە تا رەوانەی ئەنجومەنی نوێنەران بکرێت.
د. بڕیار رەشید ئەندامی ئەنجومەنی نوێنەرانی عێراق بە تۆڕی میدیایی ئێستای راگەیاند، “پرۆژەیاسای بودجە هێشتا لە وەزارەتیی داراییە، چاوەڕێ دەکەن لەگەڵ وەفدی هەرێم کۆببنەوە و پشکی هەرێم لە پرۆژە یاساکە یەکلایی بکەنەوە”.
ئاماژەی بەوەشکرد، “لەدوای یەکلاکردنەوەی پشکی کورد، پرۆژەکە دەچێتە ئەنجومەنی ئابووری ئەوان بۆچوونی خۆیان لەبارەیەوە دەخەنەڕوو و پاشان رەوانەی ئەنجومەنی وەزیران دەکرێت و لەدوای پەسەندکردنیشی لە لایەن ئەوانەوە رەوانەی ئەنجومەنی نوێنەران دەکرێت”.
ئاشکراشیکرد، “چاوەڕێ دەکرێت هەفتەی داهاتوو وەفدی هەرێم سەردانی بەغداد بکەن و پشکی هەرێم لە پرۆژەیاساکەدا یەکلایی بکەنەوە”.
