قوباد تاڵەبانی جێگری سەرۆك وەزیران لە سلێمانی بەشداریكرد لە رێوڕەسمی كردنەوەی فێستیڤاڵی بیت 23 بۆ تەكنەلۆژیا و ژینگەی سەوز كە بۆ ماوەی پێنج رۆژ بەردەوامدەبێت.
فێستیڤاڵی بیت 23 بە دروشمی ” داهاتوو بۆ تەكنەلۆژیا و ژینگەی سەوزە” چەندین چالاكی جۆراوجۆر لەخۆدەگرێت و هەریەكە لە رێكخراوی GIZی ئەڵمانی و كۆمپانیای بۆتان و نووسینگەی جێگری سەرۆك وەزیرانی هەرێم سپۆنسەری فێستیڤاڵەكەن.
لە فێستیڤاڵەكەدا چەند ۆرك شۆپ و پانێڵی تایبەت بە داهاتووی تەكنەلۆژیا و ژینگەی سەوز لە كوردستان بەڕێوەدەچێت، گەنجانی بەشداربوو لە پێشانگایەكدا زیاتر لە 20 جۆر بزنسی نوێ نمایشدەكەن.
شوێنی ڤێستیڤاڵەكە كارگەی كەلتووری سلێمانییە و هاوڵاتییان دەتوانن بۆ ماوەی پێنج رۆژ سەردانی بكەن.
لە وتەیەكیشدا جێگری سەرۆك وەزیران رایگەیاند، لە بواری بە دیجيتاڵكردنی فەرمانگەكان گەشبین ترم و بە فەخرەوە باس لە چالاكییەكان دەكرێت كە بریتییە لە تۆماری بایۆمەتری و تۆماركردنی كۆمپانیاكان و مووچەی خانەنشینان.
ئاماژەی بۆ ئەوەش كرد، پێشتر لە دابەشكردنی مووچەی خانەنشیناندا گرفت هەبووە و لە ئێستادا خانەنشینان بە سیستمی دیجیتاڵی و بە كارت مووچە وەردەگرن.
