تەندروستیی سلێمانی، رەتیدەكاتەوە هیچ ڤایرۆسێكی ترسناك لە شاری سلێمانی بڵاوبووبێتەوە و جەختدەكاتەوە، ئەوەی هەیە تەنها پەتای وەرزیی ئاساییە و لە هەموو جیهاندا بەربڵاوە.
د. رزگار عەلی بەڕێوەبەری خۆپاراستنی تەندروستیی سلێمانی، سەرجەم ئەو دەنگۆیانەی رەتكردەوە كە باس لە بڵاوبوونەوەی ڤایرۆسێكی ترسناك لە شاری سلێمانی دەكەن و رایگەیاند، “چەند رۆژێكە دەنگۆیەك لە دەزگاكانی راگەیاندن بڵاوبووەتەوە گوایە ڤایرۆسێكی ترسناك لە شاری سلێمانی بڵاوبووەتەوە و چەند كەسێك بەهۆی ئەو ڤایرۆسەوە گیانیانلەدەستداوە، بەڵام سەرلەبەری ئەو دەنگۆیە ناڕاستە و هیچ جۆرە ڤایرۆسێكی ترسناك لە سلێمانی بڵاونەبووەتەوە”.
لەبارەی ئەو پەتایەی بڵاوبووەتەوە، بەڕێوەبەری خۆپاراستنی تەندروستیی سلێمانی ئاشكرایكرد، “ئەوەی هەیە بریتییە لە ئەنفلۆنزای وەرزی، كە لە هەرێمی كوردستان و عێراق و جیهانیش هەیە لەم وەرزە ساردەدا”.
د. رزگار عەلی جەختیكردەوە، “ئێستا لە هەموو ناوچە ساردەكانی جیهان پەتای ئەنفلۆنزای وەرزی هەیە و هیچ كەسێكیش بەم پەتایە گیانیلەدەستنەداوە”.
رێنمایی ئەوەشی دا بە هاوڵاتییان كە بۆ خۆپارێزی لە ئەنفلۆنزای وەزری، لە شوێنە گشتییەكان دەمامك ببەستن و دووربكەونەوە لە كەسی تووشبوو، هەروەها هۆكارەكانی پاكژكردنەوە بەكاربهێنن و دەستەكانیان بشۆن و هەواگۆڕكێكردن لە شوێنە داخراوەكاندا هەبێت.
