وەزارەتی پەروەردەی عێراق، چەند بڕیارێکی لە بەرژەوەندیی مامۆستایانی خوێندنی کوردی لە خورماتوو دەركرد و دەتوانن پۆست وەربگرن.
لە لێدوانێكدا بۆ تۆڕی میدیایی ئێستا، مەلا كەریم شكور ئەندامی فراكسیۆنی (ی. ن. ك) لە ئەنجومەنی نوێنەران رایگەیاند، کێشە و گرفتەکانی مامۆستایانی خوێندنی کوردییان گەیاندووە بە وەزیری پەروەردە و داوای چارەسەریان كردووە، لە وەڵامدا وەزیری پەروەردەی عێراق چەند بڕیارێكی دەركردووە، كە بریتین لەوەی مامۆستایانی خوێندنی کوردی لە خورماتوو، دەتوانن ھاوشێوەی پارێزگاکانی کەرکوک و دیالە وەک بەڕێوەبەر و یاریدەدەری قوتابخانەکان دیاریبکرێن.
بەپێی بڕیارەكان، مامۆستایانی خوێندنی کوردی دەتوانرێت وەک چاودێر لەسەر ھۆڵەکانی تاقیکردنەوەکانی نیوەی وەرز و کۆتایی ساڵ و تاقیکردنەوەکانی وەزاریی پۆلە کۆتاکان دابنرێن، هەروەها بەشداربن لە پێداچوونەوە (تصحيح) بە دەفتەری تاقیکردنەوەی پۆلە کۆتان لە رێگەی ئامادەبوونیان لە لیژنەکانی پێداچوونەوە لە ناوەندی پارێزگای سەڵاحەدین.
وتیشی، “وەزیری پەروەردە بڕیاریداوە دەرگای خۆپاڵاوتن بۆ سەرپەرشتیاری پەروەردەیی بۆ ئەم ساڵ بكرێتەوە، مامۆستایانی خوێندنی كوردی لە خورماتوو دەتوانن بەپێی رێساکان خۆیان كاندیدبكەن بۆ بوون بە سەرپەرشتیاری پەروەردەیی”.
