بەهۆی ناڕەزایی دانیشتووانی ناوچەکە و گوندەکانی دەوروبەری گواستنەوەی نەوت لە کێڵگەی سارتە کە کۆمپانیای گەنەڵ ئینێرجیی تورکی بەڕێوەی دەبات، ماوەی 10 رۆژە راگیراوە.
دانیشتووانی گوندی چڕە و گوندەکانی دەوروبەری ناڕەزایی دەردەبڕن لە دانەمەزراندنیان لە کێڵگەی نەوتی سارتە، بەوهۆیەوە ڕێگای گواستنەوەی نەوتییان لە کێڵگەی سارتەوە بۆ پاڵاوگەی کەڵەک و وێستگەی پەمپی خورمەڵە راگرتووە، بەوهۆیەوە ماوەی 10 رۆژە نەوت لە کێڵگەی نەوتی سارتەوە لە سنووری پارێزگای هەولێر نەگواستراوەتەوە.
هەروەها دانیشتووانی ئەو ناوچەیە رێگرییان لە چوونی کارمەندانی کێڵگەکە کردووە بۆ سەر کارەکانیان و داوای دامەزراندنی بەشێک لە هاوڵاتییانی گوندەکە دەکەن لەو کێڵگە نەوتییەی سنوورەکەیان.
کێڵگەی نەوتی سارتە دەکەوێتە خوارووی زێی گەورە لە سنووری گوندەکانی چڕە و چنارۆک و گەرووی دەلالان و زەرگەزەوی لە سنووری ناحیەی دارەشەکران لە پارێزگای هەولێر.
کێڵگەکە لە لایەن کۆمپانیای گەنەڵ ئینێرجیی تورکییەوە بەڕێوە دەبرێت و بەرهەمی رۆژانەی لە 10 هەزار بەرمیلەوە لە ساڵی 2021 دابەزیوە بۆ چوار هەزار بەرمیلی رۆژانە.
