لەلایەن هێزەكانی پۆلیسی هەولێرەوە كەسێك بەتۆمەتی بەكارهێنانی ماددەی هۆشبەر دەستگیركرا و دەستیش بەسەر بڕێك لەو ماددانەدا گیرا.
بەڕێوەبەرایەتیی پۆلیسی پارێزگای هەولێر رایگەیاند، لەلایەن هێزەكانی بنكەی پۆلیسی شاوێس تۆمەتبارێك بەناوی (ک.س.ر.) بە تۆمەتی بەکارهێنانی ماددەی هۆشبەر دەستگیركرا.
لە کاتی دەستگیرکردنیدا دەست بەسەر پێنج کیس ماددەی هۆشبەر لە جۆری کریستاڵ و سێ شوشەی پایپ و چەندین کەلوپەلی تردا گیرا کە بۆ کێشانی ماددەی هۆشبەر بەکاردەهێنران، وەك ئەوەی پۆلیسی هەولێر ئاماژەی پێداوە.
ئەوەشی خستەڕوو، تۆمەتبار پەڕاوی لێکۆڵینەوەی بۆ رێکخرا و رەوانەی دادگا کرا، لەلایەن دادوەری لێکۆڵینەوەوە بڕیاردرا بە راگرتنی بەپێی ماددە (26)ی یاسای ماددە هۆشبەرەکان.
