نووسینگەی راگەیاندنی بافڵ جەلال تاڵەبانی راگەیەندراوێكی لەبارەی بەشداریی سەرۆكی یەكێتی لە كۆنفرانسی ئاسایشی میونشن بڵاوكردەوە.
دەقی راگەیەندراوەكە:
بافڵ جەلال تاڵەبانی، سەرۆکی یەکێتیی نیشتمانیی کوردستان بەشداریکرد لە کۆنفرانسی ئاسایشی میونشن 2024، لە کۆنفرانسەکەدا توانی راستەوخۆ پەیامی یەکێتیی نیشتمانیی کوردستان بگەیەنێتە هاوڕێ و هاوپەیمانان لە جیهاندا.
لە ماوەی کۆنفرانسەکەدا، سەرۆک بافڵ چەندین کۆبوونەوەی بەشێوەی تایبەت و فەرمی لەگەڵ سەرۆکی حکومەتەکان، دیپلۆماتکاران، سیاسییەکان و شارەزا سەربازییەکاندا کرد تاوەکو بارودۆخی جدیی عیراق بە گشتی و هەرێمی کوردستان بەتایبەتی بگەیەنێتە سەرۆک و بەرپرسە باڵاکانی جیهان.
سەرۆک بافڵ جەختی لەو راستییە کردەوە، شەڕ دژی رێکخراوە تیرۆریستییەکان کۆتایینەهاتووە و تیشکی خستەسەر ئەو بارودۆخە ناسەقامگیرەی کە بەهۆی ململانێ هەرێمییەکانەوە بەرۆکی ناوچەکەی گرتووە.
هەروەها پێویستیی مانەوەی هێزەکانی هاوپەیمانیی نێودەوڵەتی لە هەرێمی کوردستان و عیراق روونکردەوە و رایگەیاند، مانەوەی هێزەکان دەبێت بەشێوازێک بێت کە لەگەڵ خواست، پێویستییەکانی ئاشتی و سەقامگیریی ئەمڕۆی ناوچەکەدا بگونجێت.
سەرۆک بافڵ جەلال تاڵەبانی باسی لە هەوڵە بەردەوامەکانی یەکێتی کرد بۆ زیاتر هەماهەنگیی تیمی یەکێتیی نیشتمانیی کوردستان لە ناو حکومەتی هەرێمی کوردستان و حکومەتی فیدراڵدا. گرنگیی هەڵبژاردنەکانی هەرێمی کوردستان، ئامادەکارییەکان لە کاتی خۆیدا و دڵنیایی سەرکەوتن و بێگەردی ئەم هەڵبژاردنانە تەوەرێکی دیکەی گفتوگۆکان بوون لەگەڵ ئەو بەرپرسانەی کۆبوونەوەی لەگەڵ ئەنجامدان لە کۆنفرانسی ئاسایشی میونشن.
نووسینگەی رۆژنامەوانیی بافڵ جەلال تاڵەبانی، سەرۆکی یەکێتیی نیشتمانیی کوردستان
