رومیسا جێجلی درێژترین ژنی جیهان بۆ یەکەمجار سواری فڕۆکەبوو و لە پەیامێکیشدا رایگەیاند گەشتێکی ئاسوودەی هەبووە.
رومیسا جێجلی کە درێژی باڵای دوو مەتر و 15 سانتیمەترە، ناوی بە درێژترین ژن لە کتێبی گینز بۆ ژمارە پێوانەییەکان تۆمارکراوە، لەماوەی تەمەنیدا بەرزی باڵای بووەتە هۆی کێشە بۆ ئەوەی نەتوانێت گەشتی ئاسمانی بکات.
لە ماوەی چەند رۆژی رابردوودا کۆمپانیای فڕۆکەوانی تورکیا، گەشتێکی بۆ باڵابەرزترین ژن رێکخست کە لە تورکیاوە بۆ سان فرانسیسکۆی ئەمریکا بوو.
لەناو فڕۆکەکەدا شەش کورسی دانیشتن لابرابوون و لەبری ئەوە جێگەیەکی خەوتن بۆ جێجلی ئامادەکرابوو بۆ ئەوەی بە ئاسوودەیی و بە پاڵکەوتنەوە گەشتەکەی ئەنجامبدات.
لەدوای گەیشتنی بە شوێنی مەبەست درێژترین ژنی جیهان پەیامێکی بڵاوکردەوە کە تێیدا هاتبوو، “لە سەرەتا بۆ کۆتایی گەشتەکە هەموو شتێک باش رۆیشت”.
