کەنارگرتن لە ژمارە 39 لای شۆفێرە ئەفغانییەکان بەجۆرێک بووەتە پرسێکی گەورە کە جێگری سەرۆککۆماری ئەو وڵاتە هاتە دەنگ و ڕایگەیاند، هاتوچۆی وڵاتەکەی ئاگادارکردووەتەوە کە ژمارە 39 لە سیستم بسڕنەوە.
ئامروڵا ساڵح، جێگری سەرککۆماری ئەفغانستان لە لێدوانێکی ڕۆژنامەوانیدا ڕایگەیاندووە، “ئێستا وایلێهاتووە کە هیچ ئەفغانییەک بەلای ژمارە 39 دا ناڕوات و ناچاربووین فەرمانێک لەوبارەیەوە دەربکەین”.
خوێندنەوەی جیاواز هەیە بۆ ئەو هۆکارەی ئەفغانییەکان خۆیان لە ژمارە 39 دەپارێزن، بەڵام سەرەکیترینیان ئەوەیە کە ئەفغانییەکان پێیان وایە ئەو ژمارەیە شوومە و بەختی خراپیان بۆدەهێنێت.
خوێندنەوەیەکی دیکە هەیە کە باسی چیرۆکی پیاوێک دەکات لە شاری هیرات لەو وڵاتە، ژمارەی ئۆتۆمبیل و ماڵ و شتەکانی ژمارە 39 بووە، بەڵام خۆی و خانەوادەکەی چارەنووسێکی خراپیان هەبووە.
هۆکاری پەراوێزگرتن لە ژمارە 39 هەر جۆرێک بێت، کاریگەری گەورەی لەسەر خەڵكی ئەفغانستان هەیە و ئێستا ئیتر کەس ناوێرێت ئەو ژمارەیە لە ئۆتۆمبیلەکەی ببەستێت.
باوەڕەکە لە ئەفغانستان تەنها بۆ ژمارە 39 بە تەنها نییە، بەڵکو بۆ هەموو ئەو ژمارانەشە کە سەرەتاکەی یان کۆتایی ژمارە 39 ی تێیدایە.
